காலையில் கண் விழிக்க உதவும் செல்ஃபி அலாரம்!

காலையில் கண் விழிக்க உதவும் செல்ஃபி அலாரம்! 

இதைவிட சுவாரஸ்யமான அலாரம் சேவை இருக்க முடியாது என்று சொல்லத்தோன்றும் அளவுக்கு புதுமையான துயிலெழுப்பும் செயலி அறிமுகமாகி இருக்கிறது. 

இந்த அலாரம் செயலி உங்களை நீங்களே செல்ஃபி படம் எடுத்துக்கொள்வதன் மூலம் தூக்கத்தில் இருந்து விழித்துக்கொள்ளச்செய்கிறது.

காலையில் தூக்கத்தில் இருந்து விழிக்க நினைவூட்டும் அலாரம் சேவைகளுக்கு ஸ்மார்ட்போன் யுகத்தில் பஞ்சமே கிடையாது.

ஆனாலும் என்ன தூக்க கலக்கத்துடன் அலாரம் அலறலை அமைதியாக்கி விட்டு இன்னும் கொஞ்சம் தூங்கும் பழக்கம் தான் பலருக்கும் இருக்கிறது.

  தூக்கத்தில் இருந்து எழுந்திருக்கும் வரை விடாமல் அடித்துக்கொண்டிருக்கும் துயிலெழுப்பும் செயலிகளும் கூட அநேகம் இருக்கின்றன.

இந்த வரிசையில் துயெலுழும் பழக்கத்தை கொஞ்சம் சுவாரஸ்யமாக்கும் வகையில் புதுமையான செயலி ஒன்று அறிமுகமாகி இருக்கிறது.

'ஸ்னேப் மீ அப்' எனும் இந்த செயலி ஸ்மார்ட்போன் யுகத்து பழக்கமான செல்ஃபி எடுப்பதை காலையில் துயிலெழ அழகாக பயன்படுத்திக்கொள்கிறது.

மற்ற அலாரம் செயலிகளை போலவே இதிலும் காலையில் துயிலெழுப்புவதற்கான நேரத்தில் செட் செய்து கொள்ளலாம். 

மறுநாள் காலையில் குறிப்பிட்ட நேரம் வந்ததும், அலாரம் ஒலியெழுப்பி துயிலெழுப்பும்.அதன் பின்னர்தான் சுவாரஸ்யமே இருக்கிறது.

இதற்குள் செயலி, போனின் காமிராவை ஆன் செய்திருக்கும். அலாரம் ஒலியை நிறுத்த வேண்டும் என்றால் ஸ்மார்ட்போனை கையில் எடுத்து அதை நோக்கி முகம் பார்த்து அழகாக (!) ஒரு செல்பி எடுத்துக்கொள்ள வேண்டும். 

இதற்கு மின்விளைக்கையும் ஆன் செய்தாக வேண்டும். உங்கள் புகைப்படத்தை பார்த்த பின்தான் செயலி அமைதியாகும். எப்படியும், போனை கையில் எடுத்து காமிராவை பார்த்து போஸ் கொடுத்து, செல்ஃபி எடுத்துக்கொள்ள வேண்டும் என்றால், தூக்கம் தானாக கலைந்து போகத்தானே செய்யும். அதைத்தான் இந்த செயலி செய்கிறது.

அலாரம் ஒலியை விரும்பிய வகையில் அமைத்துக்கொள்ளலாம். அதோடு நீங்கள் தினமும் எடுக்கும் செயலிகளை மை ஸ்னேப்ஸ் என் சேமித்தும் வைத்துக்கொள்ளலாம். மற்றவர்களுடன் ஷேர் செய்யலாம். ( அதிகாலை நேர செல்ஃபியை ஷேர் செய்வது கொஞ்சம் விஷப்பரீட்சை தான்). எனவே புன்னகையுடன் படம் எடுத்துக்கொள்ளுங்கள்.

நீங்கள் விரும்பினால் தினமும் உங்களை விழிக்கச்செய்ய உங்கள் செல்ஃபி காலரியில் இருந்தே ஒரு புகைப்படம் காண்பிக்கப்படும் வசதியும் இருக்கிறது.

செல்ஃபி மோகத்தை அழகாக பயன்படுத்திக்கொண்டு இந்த செயலி உருவாக்கப்பட்டுள்ளது. ஆண்ட்ராய்டு போன்களில் செயல்படுகிறது. அடுத்த கட்டமாக ஐபோனுக்கும் வரலாம்.


ஆண்ட்ராய்டில் தரவிறக்கம் செய்ய; https://play.google.com/store/apps/details?id=com.dehun.snapmeup&hl=en

கணினி வேலை செய்கிறீர்களா, ஜாக்கிரதை!

 

 

 

கணினித் திரையைப் பல மணி நேரம் தொடர்ந்து பார்த்துக் கொண்டிருக்கிறீர்களா? கண் சோர்வு, வறண்ட கண்கள், பார்ப்பதில் அசவுகரியம், தலைவலி, மன அழுத்தம் போன்றவை ஏற்படும் ஆபத்து உள்ளது. கணினிப் பயன்பாட்டால் ஏற்படும் பார்வைக் கோளாறு, கணினிப் பார்வைக் கோளாறு (Computer Vision Syndrome) எனப்படுகிறது. 

நம்முடைய கண்கள் மின்னணுக் கருவிகளைத் தொடர்ந்து பார்க்கும் வகையில் அமையவில்லை என்பதாலேயே, இது போன்ற சிக்கல்கள் ஏற்படுகின்றன. அதற்காக நவீனத் தொழில்நுட்பங்களைப் புறந்தள்ளிவிட்டுச் செயல்படும் காலகட்டத்திலும் நாம் வாழவில்லை. ஆனால், கண்கள் பாதிக்கப்படாமல் எப்படிக் காப்பாற்றிக்கொள்வது? 

கணினித் தொழில் சார்ந்தவராக நீங்கள் இருந்தா லும், உங்கள் கண்களுக்கு அடிக்கடி புத்துணர்ச்சி ஊட்டிக் கொள்ளுங்கள். இதற்கு முதல் வழி, விழியின் நண்பனாக மாறுவதுதான். அலுவலகச் சூழலும் பார்வையைப் பாதுகாக்கும் வகையில் மாற்றப்பட வேண்டும். 

பார்க்கும் விதம்

 

பொதுவாகக் கணினியில் வேலை செய்யும்போது, நம்மை அறியாமல் மணிக்கணக்கில் கணினித் திரையைப் பார்த்துக்கொண்டே இருக்கிறோம். 

“இப்படிச் செய்வதால் சுருங்கி விரிய வேண்டிய கண் தசை இறுகிப் போகிறது” என்கிறார் அபினவா மருத்துவமனையின் தலைமை கண் அறுவைசிகிச்சை நிபுணர் டாக்டர் ஏ.ஜி. ரமேஷ். 

20-20-20

  

இதற்குத் தீர்வு என்ன? 20-20-20 கொள்கையைப் பின்பற்ற வேண்டும். கணினியில் வேலை செய்யும்போது 20 நிமிடங்களுக்கு ஒருமுறை கண் பார்வையைக் கணினியிலிருந்து விலக்கி 20 அடி தொலைவில் இருக்கும் ஏதேனும் ஒரு பொருளை 20 நொடிகளுக்குப் பார்க்க வேண்டும். 

"இதன் மூலம் கணினியுடன் கட்டி போடப்பட்டிருந்த கண் தசைகளுக்குச் சிறிது நேரம் ஆசுவாசம் கிடைக்கும்" என்கிறார் டாக்டர் ஏ.ஜி. ரமேஷ். 

சாதாரண மனிதர் ஒருவர் கண்களைச் சிமிட்டும் எண்ணிக்கையில், மூன்றில் ஒரு பங்குதான் கணினியில் வேலை பார்ப்பவர் சிமிட்டுகிறார் என்கின்றன இது தொடர்பான ஆய்வுகள். இதனால் கண்கள் வறண்டு போகின்றன. 

ஏசி பற்றி யோசி

 

இது மட்டுமில்லாமல், இன்று பெரும்பாலான அலுவலகங்கள் செயற்கையாகக் குளிரூட்டப்பட்ட ஏசி அறைகளில் இயங்குவதால் சுற்றுப்புறக் காற்றைக் காட்டிலும் ஏசி அறையிலிருக்கும் காற்று வறண்ட தன்மையுடன் இருக்கும். இதனாலும் கண்கள் வறண்டுபோகும். 

"இப்படி இருக்கையில், நீங்கள் கண்களை அடிக்கடி சிமிட்டுவது ரொம்பவும் அவசியம். 

அதிலும் 20 நிமிடத்துக்கு ஒரு முறை மெதுவாக 10 தடவை சிமிட்ட வேண்டும். இதனால் கண்களில் ஈரப்பதம் கூடும், கண் தசையின் அழுத்தம் குறையும்" என்பது டாக்டர் எஸ்.காயத்ரியின் அறிவுரை. கண்கள் உலர்ந்து போவதாக உணர்ந்தால், ஒரு நாளில் இரண்டு முறை கண்கள் மீது தண்ணீரை அடித்துக் கழுவுவது நல்லது. 

விழியின் நண்பனாக

 

கணினியில் ஒரு மணி நேரம் தொடர்ந்து வேலை செய்த பிறகு ஒரு சிறிய இடைவேளை எடுத்துக்கொண்டு நிறைய தண்ணீர் குடிப்பது நல்லது. 

இதனால் சருமம், கண்களின் ஈரப்பதம் அதிகரிக்கும். நீங்கள் மூக்குக் கண்ணாடி அணிபவர் என்றால் ஒளியைப் பிரதிபலிக்காத லென்ஸைப் பயன்படுத்துங்கள். 

அதேபோல, காண்டாக்ட் லென்ஸை விடவும் மூக்குக் கண்ணாடி நல்லது. ஏனென்றால், கண்ணில் ஈரப்பதம் குறைந்துபோனால் காண்டாக்ட் லென்ஸ் மேலும் பல அசவுகரியங்களை ஏற்படுத்தும்.

வேலை சூழல்

 

நீங்கள் பணிபுரியும் அலுவலகத்தின் ஒளி அமைப்பு மிகவும் முக்கியம். ஒழுங்கற்ற ஒளி அமைப்பு கண்களைப் பாதிக்கும். 

கோத்ரெஜ் உட்புறப் பணிச்சூழல் மையம் (Godrej Interio Ergonomics Cell) நடத்திய ஆய்வின் முடிவுகள் கூறுவதாவது: 68 சதவீதம் அலுவலகங்கள் சீரற்ற ஒளி அமைப்புடன் இயங்குகின்றன. 

அவற்றில் 58 சதவீதம் போதுமான வெளிச்சம் இல்லாமலும், 42 சதவீதம் அதிகப்படியான ஒளியுடனும் இருக்கின்றன. 

"240 முதல் 400 லக்ஸ் அளவிலான ஒளி அமைப்புதான் கணினி அலுவலகத்துக்குச் சரியான ஒளி அமைப்பு" என்கிறார் கோத்ரெஜ் உட்புறப் பணிச்சூழல் மையத்தின் தலைவரான சாஸ்த்ரி.

எங்கே உட்கார வேண்டும்

 

நாற்காலி அமைப்பும் மிகவும் முக்கியம் என்கிறார் டாக்டர் ஏ.ஜி. ரமேஷ். கணினி வைக்கப்பட்டிருக்கும் மேஜையும், நீங்கள் அமர்ந்து வேலை செய்யும் நாற்காலியும் சவுகரியத்துக்கு ஏற்றதுபோல் மாற்றிக்கொள்ளும் வகையில் இருப்பது நல்லது. 

கணினித் திரையின் மேல்புறம் உங்கள் பார்வை மட்டத்துடன் ஒத்துப்போக வேண்டும் அல்லது பார்வையிலிருந்து 10 முதல் 15 டிகிரி வரை கீழே இருத்தல் நல்லது. நீங்கள் அமர்ந்திருக்கும் இடத்திலிருந்து 20 முதல் 24 அங்குலம் தொலைவில் மானிட்டரை வைப்பதும் முக்கியம். 

எல்.சி.டி. நல்லது

 

அதிக ரெசல்யூஷன் கொண்ட, ஒளியைப் பிரதிபலிக்காத எல்.சி.டி. (L.C.D.) திரைகளைப் பயன்படுத்துவது அவசியம். 

திரையின் அளவு குறைந்தபட்சம் 19 அங்குலம்வரை இருப்பதும், காண்ட்ராஸ்ட் கூடுதலாகவோ, குறைவாகவோ இல்லாமல் பார்வைக்குச் சவுகரியமாக இருப்பதும் முக்கியம். 

கணினித் திரையின் பின்புறத்தில் ஜன்னல் இல்லாமல் பக்கவாட்டில் இருப்பதும் நல்லது. சுவரின் நிறம் முதற்கொண்டு கண்களைக் கூசச் செய்யும் ஒளிவீச்சை ஏற்படுத்தாத வகையில் இருக்க வேண்டும். 

எல்லாவற்றுக்கும் மேலாக வருடா வருடம் மருத்துவரிடம் கண்களைப் பரிசோதிப்பது அவசியம். "ஒருவருக்கு நல்ல பார்வைத் திறன் இருந்தாலும், கணினியை நோக்கிப் பார்வையைக் குவிப்பதில் சிக்கல்கள் இருக்கலாம். அப்படி இருந்தால் கண் மருத்துவர்கள் சரியான கண்ணாடியைப் பரிந்துரைத்துக் கண்களைப் பாதுகாப்பார்கள்" என்கிறார் டாக்டர் ரமேஷ். வாழ்க்கை முழுக்க நமக்கு ஒளியைத் தரும் கண்களை அலட்சியம் செய்யலாமா?